天氣凍凍地!又要打邊爐啦!
大家好,又係我啦。今日天氣咁凍,作為邊龍王嘅我又點會錯過呢個打邊爐嘅機會呢。
今日就嚟到留一手火鍋打邊爐,其實留一首呢已經係香港一段時間㗎啦,不過我一直都未有時間試,所以今日可以嚟到食係非常興奮!
今日係嚟到呢個灣仔囍帖街嘅分店,裝修非常之靚,有種古色古香得來又唔會老土嘅感覺,而且啲擺設就好精緻添。
事不宜遲即刻講一講個湯底先,今次叫咗鴛鴦鍋,一邊係啤酒鴨而令一邊係酸菜魚,一邊酸一邊辣就最啱我呢個鍾意食酸酸辣辣嘅人啦。
就咁睇都見到湯底係非常足料,差唔多有成半隻鴨令一邊都有好多魚肉,真係可以講淨係食個湯底都飽咗一半啊。味道方面啤酒鴨有少少辣味同埋淡淡的麥香味,鴨肉都好鮮嫩。而酸菜魚方面好夠酸,唔會好似坊間嗰啲咁淡口,魚肉方面煮到啱啱好,仲係好嫩滑,所以建議大家先食魚肉再打邊爐,如果唔係就會老左,口感就會差啲啦。
而醬料方面呢都非常充足,基本嘅蔥,䔉頭,XO醬等等都非常齊備!而呢度既麻油亦都特別香,係自家製嘅品牌嚟㗎 !大家一定要試下!最搞笑係佢哋有一啲預設左嘅配搭話俾你聽,如果太多選擇唔知點搞好,不妨參考下佢哋嘅意見啊,我試過都非常好味!
第一個嚟嘅係美國安格斯牛肉,脂肪同肉嘅比例分明,只需要淥十幾秒就食得,牛味非常之重而且入口即溶,加埋我最鍾意嘅辣湯底,鮮味真係不得了!
第二個呢就係芋頭啦,大家可能會話芋頭姐!咁普通,有乜好介紹?但係我可以話俾你聽,呢度嘅芋頭係非常好味。首先呢度嘅芋頭係炸過嘅,所以一嚟到已經可以就咁食,芋頭味香濃好似食雪條咁食已經好爽。當你浸落湯嘅時候,佢就會吸收晒湯底嘅精華,而且淋左既芋頭味更加香濃,所以呢個係必選之一啊!
第三個要介紹嘅呢就係一個鬼馬蝦滑同墨魚滑!其實即係用油炸鬼包住蝦同埋墨魚去炸嘅!呢度又係一嚟就即刻食得嘅材料嚟嘅,就咁食囉吹博博加埋爽口彈牙嘅下滑同埋墨魚滑,已經非常滿足。如果將佢浸落湯裏面,加埋酸酸辣辣嘅感覺,層次又唔同咗啦,所以呢個都係必點之一啊!
最後一個要特別介紹呢就係紅糖糍粑啦,首先呢個甜品係香港並唔係太常見,而且通常都係整得唔好食,有啲可能凍左或者一個汁唔好味。但呢度呢係即叫即整嘅,所以唔使擔心佢會凍,食落去仲香脆添。是諗下食完火鍋之後,有個甜到入心嘅甜品做結尾係咪好幸福呢!